Сып, гармонїко. Дай вты звукы,
Кой гудак персты ллє габов.
Пий зо мнов, насуланьжена суко,
Пий зо мнов.

Налюбили тя, наонажили –
Хоть скач в корч.
Што так здриш на ня накуражено?
Ци в пысок хоч?

У дараба бы тя на пужало –
Страхати птиць.
Ты домак уже ня замучила –
Туй ми кониць.

Сып, гармонїко. Сып заклято.
Ты – пий вина!
Я бым лїпше тоту, цицькату, –
Вна май дурна.

Я ни перву тебе туй утрощив…
Є доста вас.
Ай з таков, гикой ты, з льофищов
Лем первый раз.

Де болить, там ни лїчиш,
Лем бай ладиш.
Я ся нигда ни скічу –
До фраца йди.

Вашу файту собачу
Ни взьме й корбач.
Йой, фрайирко, я плачу…
Ты… перебач…