Доста варьжїли сьме… Чіт.
Вглайте ся.
Слухати, што уповім,
Ймайте ся.

Чуєте: ллє ми ся з губ
Спüванка –
Онь в небесах, вижу, йде
Кыванка.

Свинча зарізали сьме
Ранинько.
Гостиме ся типир
Файнинько.

Най будуть вшытки рокы
Й дны наші
Довгі, ги гуркы сисї
Й майоші.

Най на нас никать судьба
Благüсно,
Ги мы на шовдырь здриме
Радüсно.

Най ся прüллє из небес
Мир на нас,
Ги в сисю кашу тече
Гріта масть.

А кой прийде з косов
Смирть страшна,
Сыті всї, упйиме
З нив вина.

Тїсно Смирть у тот світ
Зüбє нас,
Гикой мы в гурку йсю
Мнясо й масть.