Нüч. А спати, гикой вмерти,
Ни кортить ся штось минї -
Файнi потята у киртї
Цвiрiнькочуть, ги дурнi.
Ни дїтвак, и ни хлопчище,
Бабцї кажу, дрыжачи:
- Що за потя спüвать, свище,
Та й ни спить и уночи?!

Бабка суче тингирицю,
Й каже: - Крüтко там сиди,
Бо укусить тя в гузицю
Пуцаклїш вать чокырдий!

Урüс я такый ги треба -
Прадїды сякi были:
Голова сягає неба,
Ногы в зимлю ся впняли.
Раз за дьüвку я на свальбi
Файну бüйку учинив -
Мiлiцiшта наш, прапав бы,
У тюрму ня посадив.

Бабка суче тингирицю,
Й каже: - Што дадуть, вто iш,
Бо укусить тя в гузицю
Чокырдий вать пуцаклїш!

Уженився, ги втровив ся,
Бо жона, ги чорт, збiсна.
Уд бiды я раз напив ся,
Два - напився, й туйкы - на:
Посадили ня в фурдигу,
Ни iды, ни пити - нїт.
За токан, за мамалигу
Споминаву, ги за мньüд.

Бабка суче тингирицю,
Й каже: - Сїв ись, та сиди,
Бо укусить тя в гузицю
Пуцаклїш вать чокырдий!

Постарiв им ся, а дїти
Поврастали, ги з доры -
Годовати йих, одїти
Ни бируву, бо м старый.
Хворый, сїв собi пуд хыжу
И за вiтром держу нüс.
Тихо-мовчкы кüстку лижу,
Що сусiцькый пес принüс!

Бабка суче тингирицю,
Й каже: - Писсьоє ни iш,
Бо укусить тя в гузицю
Чокырдий вать пуцаклїш!