Сонце рано лем встає,
Вашар-пяц уже жиє:
Тко з автобуса, тко з корчüв
Улїзавуть, мывуть очи,
Розкладавуть свüй товар -
Починає ся базар.
Штримфлї, рекликы, тапловкы,
Фiнжї, мынкавi бiмбовкы,
Лады, лайбикы, лапсары,
Пайтиковi попiсары,
Жиболовкы, виндилькы,
Лопты, ляцї, питилькы,
И усякый иншый фрас -
Всьо вы купите уд нас.
Лем горниць, што в нього сцяти,
Вже ни хочуть куповати,
Бо Василь вночи устав -
Спяна повный го наклав.
Ферi вчора так напив ся,
Що лем рано похмелив ся.
Сїв у луксоши за кормань -
Спить, що удтыть го й ни вдорвеш.
Лем Марiя всьо, што є,
Файно лежа продає:
Продавала вшитку нüч -
Ни бирує удинь нич.
В Нїридьгазї по базару
Ходять шпiцликы, шандаре:
Кого хочуть - поштровфувуть,
Убберуть - ни пошкодувуть.
А пуд вичüр по дорозї
Повно нашых мафiозї:
В кого є товар хорошый,
В того просять файнi грошi.
Просять мирно, ни грозять,
А ни даш - й тебе спалять.
Кить убыйдеш ся без бüйкы,
Вчиниш и собi копiйку.
И спiшиш в ларькы мадярськi
Куповати гатї царськi.
Мiряш майшликы, пачмагы...
А як запече тя зага,
Прüмкнеш тої палинчины,
Й видиш аттаку картину:
Митер мiрять на Поланю
Будюговы из Тайваню.
Змийригована Юланка
Тяжко мiряє топанкы:
Пяты тиснуть, персты рiжуть,
А на ногы все ни лїзуть,
Бо Юланка файна была -
Мiсяць ногы вже ни мыла.
Анця так нацицник мiрять,
Што всьый пяц на ню позирать.
А Петро натяг клебан,
И такый у ньüм, ги пан.
Як узнав, ош клебан з Хуста,
Нараз дольü рукы пустив.
Лише хытрi мужi й жоны
Гангиль й туй чинити годны:
Тягнуть сiткы из светрами,
Гатiжакы с годинками -
На Вкрайину повезуть,
И выгодно продадуть.
Юра пытаться в жебы -
Ай там заробок слабый:
Мало вбы дашто купити,
Иппен тüлко вбы пропити.
Що дешево даєме,
Дуже легко прüпєме...
Видко вто є божа кара -
Тратиме час за гатаром,
А за чисть, авать за совiсть
Вже нитко нич и ни вповiсть.

Дома зимля ни орана,
Хыжа, стайня ни впорана...
Тым, тко нас привüх до сього
Запустенiя страшного,
Кажу: - Мы вту заграницю
Щи вам забєме в гузицю!