Было ми дись двадцьить рокüв,
Кой у первый раз прийшов
Копытатый, хытроокый...
А богдай бы в пеклї быв!

И ни з сього, и ни з того
Уповiв ми копыташ:
-Будеш жити доста довго
Лем кить душу ми продаш.

И почав ся торговати,
И пущати ся у блуд.
Айбо я му яв казати:
-Ни чини задарньый труд.

Ни грiшив, а ни лукавив,
Слüв паскудных ни казав -
Я щи, Богу слава, маву
Душу чисту, ги слыза.

Я й тобi ни яну лати -
Я тя й словом ни узлю.
И ни буду продавати
Вто, што й перстами ни ймлю.

Чорт потряс густов борüдков,
В бüк ня рогом поскомтав,
И вповiв: - Вто бывать рiдко
Вбы мiнї ткось удказав...

Шепче: - Ты бы сь мусїв знати,
Ош навхтема было так -
Каждый истинный писатиль
Мав зо мнов твердый контракт.

Будь ты вд Бога гинiялный,
Та кой Чорт ся за тя взьме:
Кить завадить - вчиниш мало,
Кить поможе - всьо, ги мед!

Будеш славный и богатый...
Иппен, вповiм ти єдно:
- Серенчі ни будеш мати...
- Йди до бога, Сатано!

Чуєш?! Первый раз залав им!
Злакомив ись ня, й тому
Вже продав им, вже продав им
Вто, що й перстами ни йму...-

Лем сисї слова вповiв им,
Рогом руку ми розтяв -
Чорный текст на листї бiлüм
Я черленым пудписав.

Што там было в тикстї тому?!
Што я кровльов закрiпив!?
Чорт го знає... Ги солому,
Я рокы свої спалив.

Най ни жив им первым сортом -
Всьо, што м хотїв, написав!
И хоть сам ни быв им чортом -
Чортоватым им бывав.

Знав им: всьо, што хочу – вдасть ся.
Хоть, прапав бы, Тот казав,
Ош ни буду мати щастя -
Я за щастя й ни гадав...

Тко типир мене засудить -
Най бы чисту душу мав:
Хоть писав им много блуду -
Я лем файный блуд писав!

Взад поникав, и - внїмiв им:
Як писав им - так им жив!..
Лем сисе порозумiв им -
Ткось ня за гыртанку ймив:

В серцю врвалася аорта -
Горячить ся кровльов рот...
Йшов бысь, Чорте ты,  до чорта!
Ай - мене ни слухать Чорт.

Лежу я свiжинькым трупом -
Душу Чорт понüс давно! -
Й вижу всьый живüт свüй глупый,
Ги паскудноє кiно...