Кить ись льüг извечера,
Зрана собi встань.
Ни вставай упüвночи,
Ни кывай босоркань.

Вдинь нашинїтати ся
Доста ти ачий.
В босоркань робочый час
Пüзно уночи.

Уд зорї вичüрньої
До ранньої зорї
Голосять двадушникы,
Вывуть упырї.

Босоркан гурбами,
Кой усї засплять,
Пуд гузiцї - вiникы,
Й, ги чорты, литять.

Кой зс чортами стрiтять ся,
Де ни путь, а - плай,
Висилять ся, бiсять ся,
Чинять куперай.

Нам бы вто лем никати,
Быти товды там,
Босорканї пытати
На бiду чортам.

Та кой ты у постели
Куплеш ся у снах,
Лтать з босорканями
И твоя жона.

Вдинь, ги ты, трудила ся,
Звечера лягла.
Айбо точно так, ги ты,
Спати ни могла!

Бо натура дяволська
Потягла ї в блуд -
Ходить, лїтать, мучачи
Чесный, мирный люд.

Кить приснить ти ся, ош тяшко
Тягнеш в горы гною вüз,
Вто жона твоя гузицьов
Всїлася тобi на нüс.

Кить ся снить, ош ни говориш,
Ай мычиш, ги в хлївi скот,
Вто жона твоя гузицьов
Всїлася тобi на рот.

Кить ся снить, ош дащо хочеш,
А ни можеш - вто чорты
Чинять ис твойив жüнчовков,
Што чинити мавбы сь ты!..

Бо жона, што вдинь захоче,
Вто учинить уночи.
А ты пробудиш ся рано
Фаранный, ниприпочив...

Тяжко з постели зїзаєш,
Гикой з псарнї битый вовк,
И свойüв жüнчовцї кажеш:
- Ачий чорт вночи ня товк!..

А жона махне цицьками,
Укукулить бiлый зад,
И вповiсть: - Тото лем чорту,
Кой заспить, приснить ся ад!..

Ты щи все очима клїпаш,
И сидиш собi, ги пинь,
А жона: - Штось меч у пысок,
Й починай робочый динь!

Ты, ги вüл, йдеш на роботу,
А про вто ни знаєш нич,
Ош жона в тя - босорканя -
Удробила файну нüч...