З Мигальом зайшли сьме сночи в виндиглüв.
Первый раp исьме вгатили по малüв.
-По смаку йсе щось такоє,
Гибы з слив. -
Хоть гüркоє, ни гüркоє -
Щи вгатив!

Туй Мигаль убытер уста и вповiв:
-Ипно буде, кить нам вдкрыєте гордüв.
Палинчина, богу слава,
Молода -
Бє огньом и пє ся файно,
Ги вода.

Чiлiнгочуть порцылановi фiнжї.
Штось нам баскорять жüнчовочкы чужi.
Кüлько ласкы, кüлько радости
Й тепла
Ты нам, файна палинчиночко,
Дала!

Запалив им цїгаретлик, и - дымлю.
В головi хоть єдну думку ба ци ймлю?!
-Дома дїти днись ни iли...
А жона
Уд труда за динь здурiла -
Фарадна...

Но, а я бы м радый быти фарадным,
Ай кому продам свої робочi дны?!..
Ай кому продам думкы, вать -
Драбачкы,
Вбы м тым копыльцям принüс
Грайцарь гüркый!?..

Я - учитиль, а мüй цїмбор - инженер.
Дüставали сьме дiпломы в СССР.
Ай типир пüшло такоє -
Най му фрас!
Што ни треба ни дiпломы,
Ани нас!

Бо переже ни Мигаль, ни я ни пив -
Каждый мав собi роботу, и робив.
А иннись такi часы -
Злодїйськый рай:
Кить ни знаєш гангльовати -
Умирай!

Я ни хочу умирати, а Мигаль
Пережив свого житя лише ферталь.
Ани гангиль, ани рекет -
Ни для нас.
Кандыдаты в дыпутаты?!-
Най йим фрас!

Де є злодїй май страшный, вать де є блядь
Май мерзка, гикой в парламинтї сидять?!
И завто Мигаль ся дниська
Лає фест:
-В рекет пüду, кой прüпю свüй
Интелект!

З Мигальом зайшли сьме сночи в виндиглüв,
А до рана ввüн и я домак вдурiв:
Удобрали сьме всї грошi
В корчмаря,
Я двох лепавых свини
У“форд” запряг.

Свiнї вывуть, “форд” скрипить, мы сидиме
Й щи страшнїше, гикой свiнї, лящиме.
Хоть бы ткось даштось битангам
Уповiв:
Люде заперли ся по хыжах,
Гикой мертвi.

Спить будитилями ни розбуженый народ.
Нашi свiнi тягнуть америцькый  "форд”.
Приглушила палинчина
Интелект.
Уперед, руснакы! Лем, куды -
Вперед?!.