Было дїло - было слово.
Пиля них быв мüй народ.
З стрiх соломляных, дранковых
Дощ му цяпав право в рот.

Може вто й ни дощ быв - манна,
И ни слово было - рiч:
Кликала Марiя Йвана
Сирцьом усвiтити нüч.

Тот народ ходив ногами,
Думати - копоньов мüг.
И лїгав, ги на пергамент,
Лїтопис у мозок стрiх.

Были хлопы здоровеннi,
Дуже файнi всї дьüвкы.
И дїла йих каждоденнi
Сохранялися вiкы.

Цюльовалися файтово,
Билися, ги гентешi.
И росло косицив слово
Из русинської душi.

Сохли рiкы и потокы,
Мерли замкы и хыжi.
Бог виликый жив высоко,
Русин у долiнї жив.

Господь Бог у велїй славi
И типир живе в хвалї.
А русинськый рüд жадавуть
Постирати из землї.

Боже наш! Будть нашым Богом,
И ушиткым русинам
На земли дай жити довго!..
Жити дай ушиткым нам!