Як до такого я дüйшов,
Ни розумiву и ни знаву -
Живу в державi, из яков
Ни цяткы общої ни маву.

Я родив ся на сьüв зимли,
Милїшüв сирцю уд Едема,
Де мої прадїды были
Єдинi газды уд навхтема.

Зимля, ги ушитый убрус,
У свому сирцю сотворила
Крайину - Пüдкарпацьку Русь.
И вта крайина была мила

И мамi, й няньови, дїдам!..
Й лем мы - онукы припоганi -
Вступили зимлю прийшлякам,
Крайину стратили жадану.

Усьо в нас было, ги в люди:
Європа - мати нам єдина!
Айбо в єден нищасный динь
Нас поневолила Вкрайина.

Прийшли вкрайинськi лымпакы
И почали нас вчити жити...
Пидiк диржаву за вiкы
Собi ни годны учинити...

Бо, люде, што вто за народ -
Йих бüлше сорок мiлiйонüв! -
А йим усе ткось затче рот -
Полякы, руськi ци тевтоны...

Вкрайинця нинавiдїв свiт
За агресивнüсть, нипоряднüсть -
За вто в них и державы нїт,
Та й учинити ї ни рянны,

Бо ниваловшны довести
До логiкы ни єдно дїло -
Спекульовати, продати,
Когось вбманути годны смiло...

В Карпатах галицькый десант
Прижив ся в нашüм господарствi -
Живе вкрайинськый окупант
На Пüдкарпатю, ги у царствi.

Робота чорна ни для них -
Усї: началникы, панове!..
Робüтный русин вмовк, затих -
Ни годен вповiсти ни слово...

Типир живiм як живиме:
У роднüм краю - чужаками...
А прийшлякам наш край - ги мед.
Щи й насмiхавуться нат нами:

Ниякi вы ни русины,
Вы уд навхтема - украйинце...
Та щи є й свої псї сыны,

Што лижуть чоботы чужинцям...

Ганьбiмся мовчкы, й ни сидїм:
Чинїм штось, милi русинове!
Бо нашто жити в свiтї сьüм,
Кой убивавуть твоє слово!..

Вбивавуть душу!.. Клепачом
Товчуть по сирцьови, лупашать!..
Вкрайиниць каждый багачом
Стає лише на горю нашüм.

Попровбуй гет йих прожени,
Та всьых нас в тюрмы позбивавуть.
А нас рахувуть за свини,
Вни за люди нас и ни мавуть...

Для нас комаништичный рай
Они роками будовали.
Айбо прийшов паскутству край -
Вже й команїшты поздыхали.

Лише украйинце живуть -
Соборну строять Украйину,
В яку усьых нас заженуть,
Ги у кутиць калгознi свiнї...

Кыдьбы русин тирпимüсть мав,
Переживе и дны йсї чорнi:
Комаништичный рай пропав,
Пропаде Вкрайина соборна!..

Всьый чад украйинської тьмы
Исчезне, кой пüдуть заброды!..
И впят мы станеме людьми -
Мы будеме єдным народом.

Гий, милi й добрi русины,
Тирпiть, и вiчно памнятайте,
Ош чії внукы вы й сыны,
И свою душу ни вбивайте -

Вы родне слово сокотїть,
Любiть карпатську зимлю милу,
А урватися з лихолїть
Великый Бог додасть нам силы!