В саду лежу. На небо здрю. И довго буду позирати:
Там Бог-судя, Чорт-прокурор, а Янгелы всї -адвокаты.

* * *

Я рано - iм, в полудне - iм, ввичирї - фрукты хрумаву.
И каждый вичüр перед сном минут пять-дисять думаву.

* * *

Кить постройиме державу, у якüв брехати - грiх,
Тко бы з нас, люди иннишньых, в тüв державi жити мüг?!

* * *

Вирьховино, мати моя, тко у мене - нянько?!
Я - ни знаву. Ты - забыла. Така сь у ня мамка...

* * *

Пüдкарпатскiє русины, оставте снотворне пити -
Кроме спаня уночи мош: Красти!  Битись!!  В блуд ходити!!!

* * *

Я русин быв, єсьм. И буду хосновати наш гандон:
Долар вержу у помыї, в тарцу покладу купон!

* * *

Карпаты - рай для злодїйüв, котрым и в зливу - сухо.
А простi люде там иннись вмиравуть, гикой мухы...

* * *

В Карпатах нынї ковдошüв дись пять из дисяти,
А другi пять тым ковдошам ни мавуть што дати...

* * *

У наш час у сьüв державi каждый в своє ся упер:
Гыкавый пiснї спüває, глухый слухає концерт!..

* * *

Имленых злодїйüв ни жалує держава,
Но, а ниймленым - почистї, и - слава!

* * *

Вмер команїзм. Свобода дивно засвiтила
Лем на момент - иннись упят вже ся стемнїло...

* * *

Чоловiк чоловiкови - друг и товарыш?! Пропало давно!
Иннись чоловiк чоловiку вать вовк, вать - гüно...

* * *

Без маскы ходять нынї Пянство, Блядство, Безтолковüсть.
Вта маска ранше звалась - Розум, Чисть и Совiсть.

* * *

Мы за свüй час устигли тüлко всього настругати,
Што всьо ни годны сьме нияк у свiтову исторiю запхати.

* * *

Иннишньый час - гüрська вода! - нитко ни видить дно.
Лем на вирьху плыве, кыпить и свiтиться гüно!

* * *

У котрої партiї бüлше Гераклüв й Атлантüв?! -
У команїштüв?!  У дымократüв!?  У бузерантüв?!..

* * *

В колодязь плюнув, дерево зломив,
Лишив трьох копылят - ни задарь жизнь прожив.

* * *

У селї живüт селянськый яв им изучати -
Там такоє всьо смiшноє, онь хочу ... ревати...

* * *

Ци везу ся по варыши, ци зайду в сад сїлськый,
Все думаву, чому всї думавуть, ош я - дурный?!..

* * *

На свальбi сїлськüв можеш голосно й гордо
Спüвати, играти и портити воздух!

* * *

Вбы менше люде стрiлянины в свiтї чули,
Поменше треба iсти йим пасулї.

* * *

Коли пасулї попоiш, и выйдеш за трибуну,
Дай волю голосу свому - извонка и изудну!

* * *

Коли пачмагы з вас зняли, а щи й гузиця гола,
Попровбуйте всьым нагордо кланятися довкола...

* * *

Гий, Марiко, бiла дьüвко, ты ни хочеш ми дати,
Айбо хлопцї  з грüшми кажуть, ош согласна продатись...

* * *

Хотїв ся раз я притулити ит курвочцї єднüв,
Хранитиль-Янгел туй як гойкне: - Иди собі вд жонї!

* * *

В послїдньый час уд жüн многых я чуву,
Ош - здоровенный им, а - ни бируву...

* * *

На мене никавучи, нїшто ся мене бояти,
Бо я ни чорт. Хоть вже м давно рогатый.

* * *

Дотüть на зимлю з неба ни зыйде рай,
Докüть в каждüм селї ни вткрыє ся куперай.

* * *

Я - роботяга. Й нїшто генїалнüсть на ня вiшати.
Я каждый динь мушу писати, гикой - пiшати.

* * *

З коломыйков им ся вродив. З коломыйков и умру.
Коломыйкы всї - за рекет, за компютерну игру!..

* * *

Попри дорüг великых, де давно были хресты,
Стоять з пушками мафiозї - иннишнї мисiї-христы!

* * *

Усї вiдїцькi мафiозї
Най роблять в нашому калгозї!

* * *

Украйина - гора, высока, пуднебесна,
Де Пüдкарпатя - край, за которым уже - безна!

* * *

Ймили потя за гыртанку, и трощити го давай!
Та щи й гойкавуть скарбезно: “Што мовчиш? Ану - спüвай!”.

* * *

Тко ся в молодi рокы ни хоче женити,
В старости ни буде знати што з жонов чинити!..

* * *

Кому нич свiчка в церкви запалена,
Тому ни свiтить й лампаш Дїогена!..

* * *

Молодов йти до дохтора мамка ся ганьбила,
Старов ни йшла, бо казала, ош ся вже нажила.

* * *

Днись Мигаль - засраниць, завтра буде - вождь.
Так иннишня гнида завтра стане - вош.

* * *

Пяный быв им, пяный єм - хоть прийшов им в хащу вчора:
Спяну тяжко розоздрiти - де туй фауна, де флора!..

* * *

Звiдав я в Поповича Ивана, што такоє - меццо, што - сопрано?!..
Лем Иван товды такый быв пяный, що ни цят ни меццив, ни сопранив!

* * *

На высокüв полонінї Цiцерон всьым каже,
Ош Марiя у долiнї  днись вичüр з ним ляже!

* * *

Задушився Платон платом, впав Нерон из трону -
Позабыли давнi люде самооборону!

* * *

Ковач клепле клепачом,
А я клеплю языком!

* * *

Ты так хотїла стати удовицив, що стала сь нив. Забыла сь лем єдно,
Ош днись твоя поморщена гузиця валовшна вже лем на гüно.

* * *

Мой цюлюнок на лицьови,
Гикой штимпиль на писмови.

* * *

В кого шiпка протята,
Серуть у ню потята.

* * *

Цїмборе мüй сигiняшный, запамнятай, кить ни знаєш:
Нисеренчливüсть – тяжка,  лем серенча вагы ни має.

* * *

Памнятай: на всякых зборах подримати треба -
Най хоть тїло удпочине, докüть душу єбуть.

* * *

Уднавхтема в Пüдкарпатю, ни улїзаш з полонин -
Лем як вкрайиниць тя брязне, догадашся: ты - русин!

* * *

Денно й нощно Смирть ись чекав, кой ись быв здоровый.
А типир плануєш жити, кой Смирть йде по дворови.

* * *

Слова проты вiтру метав им, онь вискав.
Вернув слова вiтер - ударив по пыску!..

* * *

- Вкажiть ми дорогу в житєйському вирї! -
А вни ми спокüйно вказали на двирї.

* * *

Типир попровбуй уповіш, ош я ни генїялный,
Кой вшыткы за ня говорять лем злобно, лем нифайно!

* * *

Гий, Марiко, бiла дьüвко, гет ись избiснїла -
Кликала сь у быля хлопцьüв, а вни ни схотїли!..

* * *

Русинчику, фйотолчику, щи ты побануєш:
Шпурованы тоты центы мiнтом прокильтуєш!

* * *

Вта уличка драбуличка, вта уличка файна -
Я ї вшытку зшийталуву, бо м дьüвочка дайна!

* * *

Ниє розуму в копони - нигда го й ни треба,
Коли розум подзинькує грайцарями в жебi!

* * *

Вшколов мiряти културу - сам себе обдуриш.
Лїпше мiряти ошколу тыв, що є, културов!

* * *

Ни вбивай никого нигда - ги дисятьох вбити,
Май приятнїше, май лїпше єдного вчинити!

* * *

Дасть Бог будучнüсть, кой вшыткы будем равноправны -
Червакы всьых будуть грызты єднако исправно!

* * *

Хоч дашто мати, та ни спи - най очи добре здрять.
Хоч много мати, та чини - лем докüть другi сплять!

* * *

Ни так тяжко клубок ниток в довжїнь розмотати,
Гикой тяжко всї узликы в нитках розязати!

* * *

Вчини добре дияволу - озьме тя у пекло:
Бо инколи ногы мерзнуть и тамкы, де тепло!

* * *

Правда вд золота дорожа. Вшыткы, тко йсе знає,
Лем золото домü тягне, золото збирає!..

* * *

Мы пєме за Йоланку, мы пєме за Йоганку -
Йсе є наша послїдня и рiшитилна пянка!

* * *

Ньютон - паскуда! За його закон завiсити го мало -
Ввüн виден, ош мы пыском падеме туды, де сьме наблювали...

* * *

Звiдаву тя: - Сього лїта де лежати хочеш -
В мавзолейи у Москвi, ци на пляжи в Сочї?!..

* * *

Проходить ипный динь, минає файна нüч -
Як солодко в души, коли ни робиш нич...

* * *

Подумай: што бы ся тобi у постели хотїло,
Вбысь вiдїв у жоны лем душу, а ни тїло?!..

* * *

Завiсив ся. Бо падав снїг.
А ввüн - голодный! - iсти снїг ни мüг...

* * *

Мiнить ся зима на ярь, на осїнь ся мiнить лїто,
Лем ся в мене нич ни мiнять - робити бы й робити!..

* * *

Вбивали час, стрiляли час, ци – тратили го просто,
И - час пропав, ниє часу: упстався єден простüр!

* * *

Натягли сьме домü з-за гатара усякого фраца:
Луксошüв, леворüв, рекликüв, францы!..

* * *

Нашто ложков там махати, де нїшто поiсти -
Нашто много говорити, де нїшто вповiсти!

* * *

Што буде кой ты вмреш? - Вбысь дурно ся ни зводив:
Ушытко буде так, ги было, докüть ся сь ни вродив.

* * *

Врагам прощав. Но туй біда у тому -
Ни мüг простити цїмборови свому...

* * *

Кого бы сь ни любив - май перш себе люби:
Вбы для любови мати час - нич ни роби!

* * *

Кой буду я - Хусейн, а може щи й - Саддам,
Товды ти всї довгы у доларах уддам!..

* * *

Я, як лем мüг, ростяговав им нüч.
Попровбовав им динь, но - ни вдалося нич...

* * *

Ни плач, ош паскудно живеш,ош живüт наш ни мед -
Мы будеме жити щи гüрше, гикой живеме!

* * *

Як ни бояв им ся жити, так ся ни бою вмерти.
Лем ся єдного бою - бою ся Страха Смерти!

* * *

Ой ты, Цилю, зимо-зилю, зима бы тя вбила -
Не лем втаву убертати в руках у тя - вшвилы!..

* * *

Колись мы мали хлїб насущный, приблагый.
А днись у вшыткых хлїб єднакый - дорогый.

* * *

Всьо по вышшüв мірці йде, бо русины такi людкове:
Кить слїпый в них - лем Гомер,  кить глухый - та лем Бетховен!

* * *

Кыбы я знав, ош маву читачüв,
Та вiршi пüк бым, гикой колачї!

* * *

Вповiла: “Фuтькнеш - прилечу, мiй ипный, файный фuвнику!”…
Захотїв - фüтькнув, и - летить!.. Айбо летить - на вiнику!..

* * *

Коню - овес,  коровi - втава,
А графоманови - лем слава!

* * *

Лязь, Марiко! Чї-чї-рi!
Два раз два лем - чотыри!

* * *

Тко замолоду быв дурным, и в старости буде дурным...
Мüй Боже! Но бо я дурный – все ся мучу  єдным и тым!..

* * *

Кить у народа мудрый вождь,
Тот вождь ни пустить нарüд без ширньüвкы в дождь.

* * *

Побилися дурнi на мерви,
Гикой два цапы на берви!

* * *

Гулятика, пиятика
Довели ня до гертикы!

* * *

Довкола ушиткы сытi - лем маснi мяса iдять.
Но, а я такый голодный - мухы в черивi брынять!

* * *

Тко звык в дїлах навхтема поспiшати,
Ош бы й хотїв - ни буде череватым!..

* * *

Ни заздрів им удачам придурка й подлеця -
Менї были приміром ошибкы мудреця.

* * *

В раю прожив им довго, сыто, тепло...
Типир бы м хотїв потрафити в пекло.

* * *

И аццяка нисогласнüсть в животї быває:
Я за правду лем говорю, а ты правду маєш...

* * *

Ни тому я днись богатый, ош в достатку м досяг неба,
Ай тому, бо из годами все ми менше й менше треба...

* * *

Дуже чесно й довго треба жити,
Вбы уд Бога старüсть заслужити!..

* * *

Стара епоха ся минула на нашому дворї -
Нова епоха наступила на граблї старї.

* * *

Ушыткы истины до цяточкы вiдомi
У Кыйовi - у Акадимiйи, авать в Береговi - в Дурдомi.

* * *

Я й без вашої оцiнкы годен ипно жити:
Мене легше лемзовати, тяже - оцїнити!

* * *

Каждоє слово вiрша днись остро чуствуву кожив:
Ги м досьü писав- ни хочу, а так, ги хочу - ни можу...

* * *

Тко бы з Осою мüг, ги я, прославити Осüй,
Де вже давно мене забыли всї... Усї... Усї!

* * *

Я люблю мüй народ. А мüй народ
Мене ни любить. Любить бутерброд.

* * *

И тот, и сись за моє слово ся вхопив!..
А де сьте были   кой им  жив?!..

* * *

Зароставуть пiшаки до мої могилы -
В тüв могилї мüй скелет вже й минї ни милый...

* * *

Хоть я ни Нострадам, айбо пророчу русинам
Велику русинську щасливу крайину.