Из неба клїпать мiсяць гертикашный,
А на земли - лем лампаш нивеликый.
Тимнїє ся. З єдного боку - корчма.
А з другого - проста сїлська патика.

Бiжить Ферко и держиться за пуп:
- Йой! грüм бы го! патика вже заперта,
А в мене черево и рiже, и болить -
До рана, люде, годен им умерти!..

А Мiша йому: - Што ты варгониш?!
Пой гет у корчму - плюнь ты на патикы! -
Зайшли и упили... И так и є -
Вже пиля пупа легше чоловiку.

-У хащи ня ударило дрыво -
Якусь бы масть, та замастити рану!.. -
Патика заперта, а корчма вдкрыта.
Зайшли и упили... И так до рана...

-Тритьый мiсяць ни давуть зарплату, -
Каже Йван, кой вд корчмi пудыйшов.
-Плюнь ты, Йване, на зарплату -
Пой, та упйиме у довг...

-В мене жüнка дуже хвора,
А лїкы м йüв ни найшов...
-Не лем в тебе, Митре, бiды -
Пой, та упєме з тобов!

-Нащивила м адде мамку -
З няньком жити штось ни хоче.
Ай з Петром сусїдськым кривым
Все варгоче, та варгоче...

-Но, та що тобi до ниї -
Пой, та упєме, Олено.
Бо кой жüнка собi упє -
В ниї й печено, й варено!..

-Дiтвак у ня засраниць и сопляк -
Ходи за ним, та лем склянкы зазбируй...
А днись го посадили у тюрму -
Вповiли: головным быв рекетиром!..

-Я йсю патику так бым рознесла,
Обы нигде вд ниї й ни было слїду!..
Вже тыждинь прошу, а лїкüв ниє
Ни вд  францы,  ани вд спiду!..

-Та што тот спiд?!.. У мене онь гертика,
А туй ни порошкüв, ани уколüв!..
-Идїм та упєме!.. - И погары звинять,
Як ни звинїли щи нигде й николи...

-Я быв чесным команїштом,
Вiровав им в команїзм!..
-И такоє годно быти,
Лем без шору туй ни лїзь!

-Я быв рухüвцьом великым,
Я за всьых вас пострадав!.
-Кой ись хотїв пити задарь,
Та корчмарь ти в пысок дав?!..

-А я ганьблюся, люде, уповiсти,
Бо вже три дны, як нич ни маву iсти...
-Ты думаш, ош у нас штось є!?..
И запросили го за столик сїсти...

Пуста патика. Корчма вся набита
Людьми, ци тыми, тко щи лише вчора
Гадав, ош и овüн є чоловiк!..-
Нипотрiб мече гет держава хвора...

Вмер мiсяць гертикашный. Лампаш вгас.
И люде хворi тихо повгасали...
Я став пуд лампашом, и звiдаву ся вас:
-Коли щи мы так мерзко й довго спали?!!