Лишив жüнку в хыжи, свинча - в шопi,
По двору голодный цабать сын...
Вто ни призрак бродить по Європi -
Вто з гатiжаком брыде русин.

Сам голодный - гüрше, гикой пяный! -
Всьый швийцарськый сыр бы йзїв самый!
Нюхать у Голландiйи тюльпаны,
В Билгiйи обнюхує корчмы...

В Полщи дуже рано помолив ся.
Мадярщину за динь проступав.
В Югославiйи з хорватами побив ся.
В Монте-Карло гатiжак прüйграв.

Быв у Ватїканї. Вiдїв папу.
Штось з ним по-русинськы морконїв -
Видко, ош просив уд папы гроши -
Папа дав. Ачий пак ни збiднїв.

У Парижи з моста Сен-Мiшеля
В Сену друтив го якыйсь пiжон.
Тамкы му прилип на нижню губу
Добре похоснованый гандон.

У Мадрiдї нащивив корiду.
Бык з арены носом кой потяг,
И як рушить - просто на русина! -
Щастя, што тот быв у постолах.

Гнав го до ишпанського гатара -
Рогом трiчї по гузици дав!..
Русин постолы свої поправив -
Вже по Португалiйи ступав.

В Португалiйи всї жоны - португалкы,
Што по-нашому - давалкы. Всї давуть.
Русин там нафаралловав ся, вслабнув...
Сїв на шiфу, й чинить морськый путь.

Плавлючи по морю, наблював ся,
Похлептав прокыслої воды.
Та завто на всьый живüт дüзнав ся,
Ош в Израйилю - єдны жиды.

А в Туреччинї всї - туркы. Боже!
Як вни по-турицькы лопонять!..
У Єгиптi  з валькüв учининi
Пiрамiды, ги стогы, стоять.

Зашпотав ся - впав у якусь воду!
У Єгиптi звуть вту воду - Нїл.
Пуд водов свиня го укусила:
Там свиню вту кличуть - крокодїл.

В Сiрiйи му в пысок надавали -
Там якыйсь чучмек ногов го бив,
Й гойкав: - Обы призрак из Європы
В Африку бüлш нигда ни ходив!

-Гута бы тя, малфо азiацька!
Ни чини ся!.. Бо сь имак ни пан!.. -
Гойкнув русин, й на льоту имив ся
На панамириканськый йироплан.

Йироплан литїв понад Карпаты,
Русин нагло возüр удопер,
И увiдїв до половкы стертi
Буквы на земли: СРСР.

Льотчикови гойкнув: - Стüй! Я туй злїзаву! -
Льотчик му ширньüвку в рукы дав,
Й друтив го у возüр. Русин точно
На своє обшарiчко упав.

Никать: хыжа мало менша стала.
А жона гикойбы пудросла.
И в дворї дїти троїчко цабать!..
- Уткüть двох гинтых ись узяла?!..

- Утüiть! Уткüть!! Ты, ги призрак, бродиш
По Європi. А домü зайдеш,
И дурницю звiдаш. Мiсто того,
Вбы зазвiдати, ош свинча де?!..

Свинча здохло з голоду. А дїти
Ни здыхавуть, бо русинськый дух
Живить йих, и пойить йих, годує!..
Што сь внїмiв?! Ци, може, вже сь углух!?..

Што ты бродиш, призраку русинськый!?
Ци ни маєш дома важных дїл?!
А богдай тя бык мадрiцькый копнув!
А богдай тя флецнув крокодїл!

Призрак рукавом убытер смолi,
З постолüв стрях порох свiтовый,
И вповiв: - У призрачнüв сьüв жизни
Уд иннись пuчну етап новый.

Почав, ци ни почав - чорт го знає!
Иппен бродить, ги й давно, самый.
Кить принюховати ся ид чомусь  стане,
Думать за тюльпаны, за корчмы.

Русин, кой ся шüпать у гузицю,
Думать за корiду за Мадрiд.
А кой ся у голову пошüпать,
Споминає всьый паскудный свiт.