Йих было пять -
                                майстрüв словесно безсмысленных звiрств.
Нитко и нигде йих ни слухав,
                               ни друковав, ни читав:
Символїст, имажинїст, сюрреалїст,
                                концептуалїст, бiтангiст.
И каждый май бüлшый погар вд свому пыскови рвав.

Быв первый, ги Пруст, другый -ги Джойс,
                                тритьый схожый на Ноя,
Четвертый - ги Далї, пятый -
                                ги Хармс, карiку в носї носив:
Быв даун, дибiл, олигофрен, шизофреник
                                и паранойик -
Йсе кить раховати йих май легкi битїжности.

Кой первый раз, ги свiнї, понапивали ся поєты,
И вже мохом уброслу бочку улизали гет до динця,
Завiшеный на хыжню геренду закывав ся петек -
Йсе иппен такоє, гикойбы здыхала жива щи вüця.

А дале ся почали мiряти, ош тко из них
                                май розумный:
Даун Пруст?! Дибiл Джойс!? Ной олигофрен?!
Шизофреник Далї!? Ци з карiков у носї Хармс,
                               што - сумно
Словом товстым имав
                               типирüшньый тонкый момент?!..

В унїтаза ся удкрыли очи,
                               кой сюрреалїст сїв голым задом на унїтаз,
Возоры ся позакрывали,
                                краны закашлали, трiс падамент,
Стїны стали човколадовi,
                               ни запаленый шваблик загас,
Ленїн продав Брежнєву лысину,
                               ги якыйись цїнный предмет...

В хыжи - мiнус двадцьить,
                                на улици - плюс двадцьить:
Йсе значить, што в склянцї - руно сорок.
А я вас звiдаву,
                ош ци варто йим было так напивати ся?!!
И вiруву,
                ош вы ми на йсе утвiтите щи ни скоро...