Удколи малым ся тямлю,
Й до типир бы м ни зличив,
Кüлько раp ня жид осüйськый
Вчаловав та й обманив.

Но, на мою душу, нигда
Я ни сердив ся за вто...
Та й жидüв в Осойи было
Точно бüлше гикой сто.

Як мы мирно в час тот жили -
Днись лише ми снять ся сны...
Кром жидüв в Осойи были
Лем цигане й русины.

Брешу! - Щи єдна словачка
Жила в нашому силї.
А вкрайинця - ни єдного,
И никого – з мацкальüв!

А ймена жиды вті мали,
Но, такі, што най йим фрас:
Струля, Шльома, Рифка, Хайым,
Мошка, Гершко, Лийба Кац...

Вєдно сьме росли з жидами -
Тко ся бавив, тко ся бив...
Но, а я, сопляк руснацькый,
Жидку м первый раз любив...

Первый раз - поцюльовав им...
Й - было всьо, що в любви є!..
Дниська Пірошка Беркович
У Америцї жиє.

А мüй лїпшый цїмбор Шльома
Файно в шахматы играв.
Айбо нигда так ни было
Вбы вд ня з дощкы штось ни вкрав.

Бо кить Шльома ни вкраде нич,
Та згоріла бы зимля!..
Вмер, прощüн бы, на Йорданї,
Кой Израйиль вызволяв.

Знали всїі сьме, ош торгувуть
У селї лише жиды -
Всьо мінявуть, всьым ганглювуть -
Як старый, так молодый.

Памнятаву, Струля каже:
- По жидüськы говорім:
Моді яну, лайфы біну,
Шма исрайиль, цум пурім.

Рифка нянькови казала:
- Юре, много ни робіть -
Динь на тыждинь для спочиву
Й для молитвы удвидїть.

Ни было так, вбы в час трудный
Ткось дакомусь ни помог:
Русин, жид и циган знали -
В небі є виликый Бог!

Тко до церкви, тко до бужнї
У сятый свüй динь ходив.
Русин, жид и циган мали
Свüй вкримішньый тинитüв.

Та єдного дня у бужни
Рабин голосно вповів:
- Для жидüів усього світа
Місто стрічі - Тиль-Авів.

Туй якраз словачка вмерла,
Кой жиды йти гет яли...
Циганüв взяли в Домбасы...
Русин сам ся впстав в селї...

Сам ся впстав, та нинадовго -
Из чужинської зимлї
Почали в село нам гнати
Украйинцьüв, мацкальüв...

Кажуть: нас ослободили,
И типир на них робім!..
Моді яну, лайфы біну,
Шма исрайиль, цум пурім!

Ай... Та нашто буду лати!..
Кажуть - жид вонячым быв...
А - мацкаль?! А - украйиниць,
Що на палинцї розтыв?!..

Кить мыши ниє в коморї,
Там ся кüнчила іда.
Кить ниє у селї жида -
Йде в село страшна біда!

Притулив мойих сусїдüв
Тиль-Авів, авать Нью-Йорк.
Вни там, ги я туй, бідувуть?!..
Про тото лем знає Бог!

А типир самі, руснаку,
По-жидüськы говорім:
Моді яну, лайфы біну,
Шма исрайиль, цум пурім...