Обы я здох, обы в ня грüм ударив,
Обы навхтема ногы ми вдняло,
Обы ня Бог своыив страшеннов каров
Настиг за вставленым iдов столом,

                               Туй тко ни годен красти,
                               Валовшен лем пропасти!

Обы ни в чüм й нигде ми ни вело ся,
Обы ми всьо йшло вон, що пхаву вдну,
Обы моє розумноє волося
Лишило мою голову дурну,

                               Туй тко ни годен красти,
                               Валовшен лем пропасти!

Обы ми з хыжi ссвада ни пропала,
Вбы м каждый рüк когось вüз в тинитüв,
Вбы м мав жону, а вна вбы ня ни мала,
Вбы м половiньов яснов изгорiв,

                               Туй тко ни годен красти,
                               Валовшен лем пропасти!

Бо я ти днись чим хочеш ся залаву,
И чим лем хочеш, тым ся закляну,
Ош я на свiтї вшыткому ни знаву
Таку, ги наша, дрымбану страну:

                               Туй тко ни годен красти,
                               Валовшен лем пропасти!

Вбы з неба на ня падали ошвилы,
Обы м землив йшов босый по брытвах,
Вбы било мнов, ги петеком валило,
Обы ня гыд в нору до ся затяг,

                               Туй тко ни годен красти,
                               Валовшен лем пропасти!

Обы ня Бог обрüк на вшыткы бiды,
Вбы м бüльш ни чув як пiвуть кугуты,
Вбы кури мої ся несли в сусїды,
Обы м я - бiдный, а заможный - ты,

                               Туй тко ни годен красти,
                               Валовшен лем пропасти!

Обы ня Дяüiл, вбы ня гута вбила,
Обы ня на шириглях понесли,
Обы ня босорканя нащивила,
Обы ня на тернинї розпняли,

                               Туй тко ни годен красти,
                               Валовшен лем пропасти!

Най за здоровля нигда я ни знаву,
Най тягнуть ми попут порüг межу! -
Я чим лем хочеш, тым ти ся залаву,
Я чим лем хочеш, тым ся побожу -

                               Туй тко ни годен красти,
                               Валовшен лем пропасти!

Обы ня вдуло, вбы ня утруцало,
Вбы пüп на ня позрушовав престüл,
Вбы днишньої ми гiї было мало,
Обы ми на нозї згорiв постüл,

                               Туй тко ни годен красти,
                               Валовшен лем пропасти!

Обы м внїмiв, обы м навхтема вглухнув,
Вбы дураком ня звали дуракы,
Обы м закамiнїв, услїп, роспухнув,
Вбы ня живого iли червакы,

                               Туй тко ни годен красти,
                               Валовшен лем пропасти!

Обы за мнов дохторы дозирали,
Вбы м кашлав на кырвавi букаткы,
Обы ня в церкви попы лемзовали,
Обы ми помогли лем промiткы,

                               Туй тко ни годен красти,
                               Валовшен лем пропасти!

Обы ми ся у пупi розязало,
Вбы кылы ми ся по земли тягли,
Обы ня ймило и ни удпущало,
Обы ня удовiцї прокляли,

                               Туй тко ни годен красти,
                               Валовшен лем пропасти!

Обы ми бüлш на свiтї сьüм ни жити,
Обы ми в Палестiнї скло товкти!..-
Я годен ся чим хочеш побожити,
Я годен ся чим хочеш поклясти,

                               Туй тко ни годен красти,
                               Валовшен лем пропасти!

Вбы на чолї в ня рогы поврастали,
Вбы в ня гузиця кашлала огньом,
Обы сухi дрыва ся в ня ни ймали,
Вбы м вiдїв чорта поза каждым пньом,

                               Туй тко ни годен красти,
                               Валовшен лем пропасти!

Обы живому ворон очи здовбав,
Обы ня тяжко Луцiфер скарав,
Вбы м ся завiсив - и там вiсїв довго,
Обы м иржавi клинцї з кровльов срав,

                               Туй тко ни годен красти,
                               Валовшен лем пропасти!

Обы ми нигда рукы ни служили,
Обы ми яйця зжмакала свиня,
Вбы ми з гузiцї повлїзали жилы,
Вбы з пуцков ми ся бавила дїтня,

                               Туй тко ни годен красти,
                               Валовшен лем пропасти!

Обы ня Бог! Обы ня Чорт! Обы ня Мати!
Обы ня Втиць! Обы ня Динь! Обы ня Нüч!..
Кить хоч - чим хоч я можу ся залати:
В нас й за сто рокüв ся ни змiнить нич! -

                               Туй тко ни годен красти,
                               Валовшен лем пропасти!