Я русин быв и єсьм. И буду
Натуру мати лем руснацьку.
Бывало я ходив на ламаня
В Ростовську область, ци - в Кiровограцьку.

У Комi я йшов на лїсоповал,
А стройити хыжi онь на Камчатку...
Куды лем ни метали мнов чорты,
Усяды м клав труда свого печатку.

Бывало я зберу свої куфры,
А у тайстры мириндї нафасуву,
И - ногы в рукы! - онь ся курдiлює,
По всьому нирушимому вандруву.

Союз урвав ся, врвали ся гатары,
Та я свойых куфрüв ни вер из рук:
Я русин быв и єсьм. И буде
Європа слухати мойых постолüв звук.

Привüз ня поїзд в Францию. В Париж.
Такых куфрüв ищи туй ни бывало.
Просто м на штацiйи на цїмент сїв,
И шовдыря м угрыз собi нимало.

Ублизовав ся ни єден француз,
Кой вiдїв як я хрумкаву цибулю.
Якась кiшассоня просила солонины,
А я йüв нараз: - Задарь ты ся впуляш!

Майперше я пüшов на пляс Пiгаль.
А там такi дьüвкы - на мою душу! -
Цицькатi, гузицятi, а - пыскатi! -
Попытав бым, айбо куфры держати мушу.

После Пiгаль - пляс Итуаль, Версаль...
Заходив им куды м лише быв годный.
Та на бiду май файный куфер мüй
Якыйсь чучмек украв уд ня в Сорбонї.

За пару днüв я спорознив тайстры,
Та и в куфрах вже iсти нич ни маву.
А на роботу ни беруть нигде -
Такых, ги я, туй, кажуть, ни приймавуть.

А бога вам французького, пак я
Быв принятый в Ростовi й на Камчатцї...
А туйкы сись задрипаный Париж!..
И вже минї лише єдно на гадцї:

Найти май старшого в сьüм варыши тупüм,
И уд душi из ним поговорити -
Пак я сюды ни ковдошом прийшов,
Пак я сюды прийшов робити!

Три дны в Парижи я началника глядав -
Сходив им мерiї, ги прерiї, и - префектуры.
На мою душу, там паны всї - дуракы,
А панiї, кить ни курвы, та - дуры!

Туй догадав ся я - в Береговi в дурдомi
Казав минї єден розумный пацїєнт,
Ош в Францiйи Наполеон май старшый.
И я найшов Наполеона пуд момент!

Поправдї фüвник сись Наполеон! -
На площади Вандомськüв став по-панськы,
У тозї импираторськüв, так нагордо,
Онь вид у нього генерално секретарськый.

Ид ньому йду ласкавый, ги тиля,
Й, ги бüг приказав, кажу: - Славайсусу!
Я туйкы, чуєте, з Берегова прийшов...
Та, перебачте ми, бо м прийти мусїв...

Туй тогу з себе звер Наполеон,
Протяг надо мнов руку: - Слава и навiкы!
У мене дниськы ниприйомный динь,
Айбо вiдiцького вже прийму чоловiка.

Я туй кой гойкну: - Тко ты?! Полїглот!?
Що й по-русинськы сь годен говорити?!..
- Вто знавуть всї:французы й русины
Народы у Європi май гоноровитi.

Я, памнятаву, щи м на Корсiцї ся вчив
Слова русинськi точно вымовляти:
Цобыркнути, здобаритися, льофа,
Манковы, фыска, нащивляти...

-Тямлю, тямлю, як ты Росiю нащивив...
-Давай ни будеме сякоє споминати,
Бо й ты типирькы нащивив Париж,
Щи й смiєш варышови сьому лати...

-Та я, кiть хоч, залаву и тобi,
Бо ты в сьüм варышови за бирова,
А що туй ипного? Курвы!
Та - мафiя совицька прездорова...

-Но, ты на мафiю язык ни пуднимай,
Бо мафiя у нас нацiонална.
Нацiоналный у нас Лувр. Нацiоналный - я.
Айбо ни тычме ся в сисе детално.

-Ни в що ся я ни тычу. Ты мiнї
Найди в сьüм варыши якусь роботу.
Бо докüть файно ни зароблю туй,
Ни на ступляй нигде ни пüду дотüть.

На мене Бонапарт попризирав,
И звiдать: - Што сь валовшен учинити?
Чому тя вчили у вошколi? Ци щи маєш
Здоровля вбы у нас по-нашому робити?!

-Йой, бо ты робиш! А ты в них - бирüв.
Кить хоч, та з тебе буду примiр брати.
Авать иди собi та втпочивай -
Я мiсто тебе годен мало постояти.

-Ты хоч уповiсти, ош я куфры озьму,
А ты мою одїнеш тогу...
Ци ты и в тозї бы сь держав куфры,
Ублепавлинi, вбыдранi, убогi?!..

Туй стою я. А ты в вас дома стüй.
Тко хоче жити в нас, та най ся кывать.
Я вiдїв и Берегово, й Осüй,
И знаву, ош у нас так ги у вас ни бывать.

-В Осойи я тебе ни вiдїв...
-Де ты быв,
Кой я туды проходив з катунами!..
Та ты ни вкручуй ся, ай говори,
Що сь годен учинити свойыма руками!..

-Я годен вчити по-французькы говорити
Дїтив ошколї...
- Но бо ты вповiв!..
Ци вже сь забыв, ош ты у Францiйи?!..
Но!?.. Што сь так побiлїв?!

Што начинила з вас совицька власть !? -
Нитко ни нашто ни валовшен.
Єдно лем файно чините: довгы -
И там ись довжен, й туй ись довжен...

Тебе, ниборе, ни спасе й Париж.
Бо де ты найдеш туй таку роботу,
Вбы ни робити нич, а грошi дüставати?!..
Уд смерти туй нитко тя ни всокотить...

-Я щи - писатиль... Я пишу книжкы...
-Тко?! Ты - писатиль!? Ни смiши гузицю -
В совицькый час писатильüв Карпаты ни дали,
Хоть датко там варив словесну кисилицю...

- Пак, що минї чинити?!
- Йди домü -
Пиши по-свому. Говори по-свому.
Майголовноє: всьо по-свойому роби -
На вгинь клади дрыва, а ни солому.

Кить думаш, ош учитиль ись - та вчи.
Писатиль - та пиши, вать тiнтов, вать цирузов.
Ни важно чим - лем важно вбы по-свому,
Й про своє. Ги у Францiйи французы.

В Парижи доста свої ковдошнї -
Я уццüть з постамента вшытко вижу.
Й типир я вижу не лише тебе -
Я вижу у Карпатах твою хыжу.

Она тя чекать. Йди собi домü.
И дома зарабляй грайцарь кырвавый.
Та никай вбы в тя дїти ни голодны.
А слава? Нашто тобi - слава!?

Ростов, Кiровоград, Камчатка, Комi,
Париж - усьо для тебе ся минуло.
Чилядник має жити дома и для дома.
Вбы серинча лицьом до тебе ся вбернула.

Ты русин быв и єсь. И будеш
Натуру мати лем руснацьку.
Для тебе лїпшої зимлї ниє й ни буде,
Ги родна - пüдкарпацька.