Первого марта  2015-го года добре знаный у вшыткому світї вандрüвник,  русин Семен Деяк  у парї  из англійцьом Саймоном Чоком на весловому човнови “СЕВЛЮШ” стартовали из острова Гранд-Канарія (порт Морган), обы переплысти  Атлантичный океан за сорок пять дüб, и, проплывши майже ош три изрї миль, довандровати до острова Барбадос.

     Човен “СЕВЛЮШ”, задовгый у двадцьить  и сїм футüв, має дві каюты: носову и кормову, два гребных  міста, но, тай ушытко, што потребувуть дває вандрüвникüв дїла самостüйної вандрüвкы через удкрытый океан.

   Думка вчинити аттаку   вандрüвку на весловому човнови через Атлантику спала на гадку русинови Семенови Деякови у децембрї 2013-го года в чилїйськüм портови Кон-Кон, куды го пригласив добре знаный у вшыткüм світї вандрüвник Федор Конюхов на свüй старт тихоокеанського перехода на весловому човнови “ТУРГОЯК”.

   Сперед старта русинськый вандрüвник Семен Семенович Деяк уповів:

   - Иппен якыхось рекордüв досягати ни маєме за цїль – мы лем хочеме каммайшіковно переплысти океан,  выходячи з наших можности тай погодних  условий.  Имак нидавно  плыв им тридцять дньüв на  яхтї  в океанї  из Нової Зеландиї через мыс Горн  до Фолклендськых островüв. Лем плавати на яхтї  тото єдно, а – весловати на вüсьüммийтровüм човнови, што є заввышкы у тридцять центüв – домак иноє.

   А закüнчує свою бисїду  сперед удплытя Семен Деяк такыма словами:

-Віруву в нашу удачу, бо маву из собов испытаный талїсман – наш русинськый прапор, што м го даз дисять годüв тому дüстав у унгварському бовтї “Файні книгы.

   Свüй житьовый путь Семен Деяк розпочав у селї Онок, што на Сивлющинї.

   Иппен тамкы й запали му в душу мамины и няньовы русинські слова, безсмертный дух якых и повüх го по великых світах.

   Молоді рокы Семен Деяк уддав службі в армійи – двадцьить и два годы в стройбатї.

    Кой став катунськым пінзіяшом, та ся поселив на побыт у руському варыши  Красноярськ.

   Быв пядисятрüчным версным  чоловіком, кой  у 2008-му годї ся стрітив у Москві из знаным вандрüвником Федором Конюховым, и удтовды ся й зачало йих вандрüвницькоє цїмбораство.

   Уже в довколасвітнüв  вандрüвцї на яхтї  “Алые паруса” Семен  Деяк мав из собов широкый русинськый прапор.

    Иппен тот русинськый прапор ся установльовав нашым русинськым вандрüвником Семеном Семеновичом Деяком на май вышшых вершках острова Пасхы, мыса Горн, Нової Зеландиї,  Фолклендскых  островüв, на 9 высочайшых вершинах  Эфиопії…  

   А позаминулого года з гордостив розгортав Семен Деяк русинськый прапор на майвышшüв точцї Сіверного полюса нашої круглинької землї.

   Щи через гüд русинськый прапор  тріпотїв на студеному вітрови, што убвівать май южну точку нашої планеты – на станційи Амундсен-Скотт у Антарктидї.

   Чоловік глубоко вірувучый у Бога, Семен Семенович каже:

   -На яку бы сьме ся вершину нашої планеты ни пуднимали, пиля нашого русинського прапора сьме встановльовали й православный хрест, и благодарили сьме Господа Бога, што сподобив нас відїти неповториму красу сотвореного ним світа.