Чесно кажучи, нияк ни розуміву,
Як бым я без слова нашого прожив:
Я уд бисїды русинської пянїву,
Ги уд палинкы, што зварена из слив,

Ги уд вітру, што травичку гладить ярню,
Ги уд первого зимушнього снїжку! -
Треба быти онь до глухости бездарным,
Вбы ни чути в слові музыку мнякку!..

Я за каждым словом вижу воздух синьый,
В каждüм слові чуву теплыню землї!..
Рüдна бисїда - тото цирьковна скриня,
Де лежать дары велікі и малі!

В церькви тüв стойить Духнович за престолом,
Й тихым голосом ся звідать дїточок:
Ци видали сьте як носять жовті пчолы
Дикый мед из тарканистых косичок?!..

Так и мы свою земну любов до Бога
Возносїм на небеса в свойых словах -
З рüдным словом по житю иде дорога
Вся напахнена у тарканистых косичках!

Рüдна бисїдо русинська, я без тебе,
Ги на полю пустый колос без зерна:
Ты - мüй колос, ты - мüй голос златостеблый,
Дны: вчорашньый, днишньый и - будучинa!