Уполудне цвітної недїлї.
Кой пüп службу у церкви кüнчав,
Склав им навхрест слова свої смілі,
И тот хрест им у рукы узяв.

Айбо чуву - в руках го ни вдержу:
Сила моя для сього мала!..
Тай на пличі го сам ни завержу…
Й туйкы чилядь менї помогла:

Хрест - на пличох є, ногы - ги струны
Уд страшної напругы гудуть!..
Ткось ми каже, ош люде розумні
Таку тяжüсть на себе ни взьмуть…

Айбо най ми тко хоче вто каже:
Сись хрест мüй, и менї го нести -
Хоть ребром най на серце ми ляже,
Буду з ним на Голгофту ити!

Тайні символы хресного ходу -
И павісы, й сята курагов
Вже были. Та ни было народу,
Што зо мнов на Голгофту бы йшов!

Лем кой слово ся світлом имило
На хрестови горіти й цвісти,
Украйинцями вчмелена чилядь
В три потокы яла за мнов йти.

А в русинüв уд Бога є сохта -
Каждый путь до кüнця идеме:
Хоть высока русинська Голгофта,
Терпеливо свüй хрест несеме.