У Василя отиць быв босоркун –
Кому штось наворожить Митрикüськый,
Тому вже ни поможе й пüп осüйськый,
Ош бы му сват! Ош бы му кум!

Вд коровы мüг вдобрати молоко,
Вчинити так обы здыхали кури,
Вать на село нагнати чорну бурю
Прогüрклым босоркунськым голоском.

Айбо Василь у няня ся ни вдав,
Тай втиць ни передав му свою силу –
Кой быв малый, та вєдно сьме ходили,
А кой пудрüс – побожным дуже став.

Василь пüшов ся вчити на попа,
Й поправдї став нипüлло поповати,
Лише судьба, гикой нирüдна мати,
Была до нього на добро скупа.

Быв перед Богом чистый, гикой скло –
Из нього стати мüг ся и ладыка.
Айбо у грüб го повела гертика –
Василь умер. Й забыло го село.