Дїла и серенча ведуть до гроши,
А я динь–нüч в дїлах и серенчи.
Та й ни тямлю вже динь такый хорошый,
Обым нич ни робив, ай – припочив.
Кить ни трудом, та хытростив и битков
Збираву своє так онь им упрів:
Я каждый динь кüнчаву ни молитвов,
Ай пунтошным рахунком грайцарьüв.

Ткось гадать собі ош овüн богатый,
Бо має доста изрüв, и – майно.
А я бым хотїв гроші всї зыбрати,
Што суть иннись, што были дись давно.
Кить бисїда за гроші – ріжу брытвов:
И за єдну копійку бы м зомлїв.
Я каждый динь кüнчаву ни молитвов,
Ай пунтошным рахунком грайцарьüв.

Я нинавижу попüв и жеброту,
Бо йим усе давай лем, та – давай:
Ты ни ковдуй – впрягай ся у роботу! –
Свüй газдüськый вüз динь и нüч дручай.
Сяк не лем я – аццяк уповість й жид вам,
Украйиниць за дутку бы здурів!..
Я каждый динь кüнчаву ни молитвов,
Ай пунтошным рахунком грайцарьüв.

Приходять в Пüдкарпатя галичане
И всьо крадуть без совісти й стыда.
Лем я чинити так ги вни ни стану:
Вни – чужакы, йим всьо в нас – ворожда.
Копійка добыває ся гонитвов,
Фаратшагом наостреных мозгüв.
Я каждый динь кüнчаву ни молитвов,
Ай пунтошным рахунком грайцарьüв.

Зза дїл ни вздрів им як ми вмерла мати,
Жона пüшла вд ня, дїти вд ня пüшли…
Айбо я дале буду зарабляти,
Обы у банках конто ми росли.
И най моє богатство файно злить вас –
Тко в нас аттак ги я розбагатїв?!..
Я каждый динь кüнчаву ни молитвов,
Ай пунтошным рахунком грайцарьüв.

Рокы прüйшли. Мене вбаляє старüсть,
Лем – докü м годен! – я ся ни даву.
Ни зарабляти гроші менї – кара:
Я зарабляву – значить я живу.
Обы ня ни вбыкрали – живу скрытно:
Исхуд, изблїд, домак им посїдїв…
Та каждый динь кüнчаву ни молитвов,
Ай – пунтошным рахунком грайцарьüв!