Ньит! Ни нараз ростуть рогы
        У малых чортüв -
Мусай лати дуже довго,
        И клясти вüтцьüв,

Мусай псами вночи выти,
        Пужати дїти,
Возоры в ошколї бити,
        Образы товкти,

Убрывати псови уха,
        А котови - хвüст,
Пудсыпати цукор мухам,
        В лопту пхати гвüзд.

Што ти добрі люде кажуть -
        В грязь перековбась:
Умащеный в чорну сажу
        В постіль чисту лязь.

Всї спüвавуть, ты - шипиляй,
        Стань ногов на торт!…
Вбы казала за тя чилядь:
        - Ни дїтвак, ай - чорт!

Так, ги чорт, пий палинчину,
        И навхтема знай:
З файного ся чорта чинить
        Файный сатана!

А коли усатанїєш,
        Й дале - сатанїй:
Упырьом будь, вовком, змийом,
        Лем козлом - ни смій!

Кой за ногы ся попыташ
        Вбысь лем не зомлїв:
На ногах ростуть копыта,
        Рогы - на чолї!

Ты уд рана и до ночи
        Мулатлуй, гуляй:
Сатана - чилядник творчый! -
        Паскудотить рай!