ЗА БОЖОЄ ДАНЯ

Бог дав менї русинськый край з рождения за вто,
Бо лем в роднüм краю живüт мош звати животом.

ЗА ДЕРЖАВУ

Держава, у котрüв прожити ни мош,
Ни має цїны на базарї й на грош

ЗА КУРТОЄ

Написав им, айно - я,
Доста помпадурноє.
Но оно май файноє
Лем тому, бо куртоє.

ЗАСУДЬБУ

Судьба многых погняцкала,
Й за мнов її пес біг.
Судьба на мене гавкала,
Лем я уд ниї втїк.

ЗА ДУРДОМЫ

Кой до смерти готовы мы,
Бо ни вбратися - нич, ани - істи,
Мы постройиме дурдомы
Для вкрайинськых економістüв.

ЗА ПРІЗІДЕНТА

Кой в державі куперай - бардак,
Де лем бандіт бандітови свисне,
Прізідент схожый на піняк,
Котрый скоро ся трісне.

ЗА ДНИШНЬОГО ПРАВИТЕЛЯ

Тот, ко бы мав попасовати козы у Загатю,
Командує иннись ушыткым Закарпатьом.

ЗА СОЛОДКЫЙ ВОЗДУХ

В краю, де м урüс, суть ми кровно рüдні
Высокі горы й потüчкы малі.
Лем туйкы можу дыхати слободно
Солоткым воздухом русинської землї.

ЗА ЖЕЛАНІЄ

Єдного прошу в Бога и желаву:
Русиніє! Щасливов будь державов!

ЗА  МАЙДОВЖЫЙ РОЗУМ

Вішай на нї пантлї, чілінговы,
Вбы упознати, ош тко и де - якый:
В нас дьüвкы суть май розумні, ги фаттьовы,
А фаттьовы май розумні, ги дьüвкы.

ЗА КУФЕР ИЗ ГРÜШМИ

Бываву - сятый, чаще - грішный:
З лїт малых им собі гадав,
Ош ци є такый куфер из грüшми,
Вбы м понести го ни бировав?...

ЗА МУЗИНЫ СЛОВА

Муза каже:- Сього дня
Ни сиди, ги пинь:
Кить ниє в стихах огня -
Меч стихы в огинь!